Դիլիջանի ժողովրդական արվեստի թանգարան
Դիլիջանի ժողովրդական արվեստի թանգարանը ստեղծվել է 1979թ. բանահավաք և գեղանկարիչ Հ. Շարամբեյանի անմիջական նախաձեռնությամբ ու մասնակցությամբ: Թանգարանի շենքը քաղաքի հնագույն շինություններից մեկն է կառուցված XIX դ. վերջին: Տունը պատկանել է իշխանուհի Մարիամ Թումանյանին և ծառայել որպես ամառանոց: Մ. Թումանյանը Արցախի մելիքների շառավիղ, շուշեցի ազնվական Մարկոս Դոլուխանյանի դուստրը, ծնվել է 1870թ.: Մ. Դոլուխանյան-Թումանյանը ժամանակի աչքի ընկնող հասարակական գործիչներից մեկն էր: Նա 1890-ական թթ. համիդյան կոտորածներից հետո, սեփական միջոցներով Դիլիջանում գաղթականների համար բացում է գորգագործական ֆաբրիկա, 1919-1920թթ.` որբանոց և արհեստանոցներ: Խորհրդային իշխանության տարիներին Սամսոն Հարությունյանը և Մարիամ Թումանյանը Դիլիջանում գտնվող իրենց ամառանոցը նվիրում են Հայաստանին:
Սյունազարդ, փայտանախշ պատշգամբով ամառանոցի շենքում հյուրընկալվել են Հովհ. Թումանյանը, Եղիշե Չարենցը, Ֆրիտյոֆ Նանսենը, դերասանուհիներ Սիրանույշը, Ազնիվ Հրաչյան, բանասեր Սերգեյ Վարդանյանը, անվանի նկարիչներ, երաժիշտներ: Տան վերջին բնակիչը Հովհ. Շարամբեյանն էր, որն էլ շենքը վերածեց ժողովրդական արվեստի թանգարանի:
Թանգարանի 9 ցուցասրահում ներկայացված են ժամանակակից հայ ժողովրդական վարպետների և ինքնուս ստեղծագործողների աշխատանքներ, ազգագրական իրեր: