ԵՐԵՎԱՆԻ ԱՐԱՐԱՏ ԿՈՆՅԱԿԻ-ԳԻՆՈՒ-ՕՂՈՒ ԿՈՄԲԻՆԱՏ

📞+374 77 036311
📍 ՀՀ, ք. Երևան, Արգիշտի 9

ԵՐԵՎԱՆԻ ԱՐԱՐԱՏ ԿՈՆՅԱԿԻ-ԳԻՆՈՒ-ՕՂՈՒ ԿՈՄԲԻՆԱՏԸ գտնվում է Երևանի ամենագեղատեսիլ վայրերից մեկում՝ Հրազդանի կիրճում` նախկին Էրիվանի բերդի տարածքում: Էրիվանի բերդը կառուցվել է 591 թվականին Սասանյան արքայից արքա Խոսրով Ափարվեզի (590-628թթ.) հրամանով այդ ժամանակի հայտնի հայ վարպետների կողմից: Երևանի (Էրիվանի) բերդը հետագա դարերում վերակառուցվել ու ամրացվել է մահմեդական խաների կողմից այն ժամանակահատվածում, երբ Հայաստանի մի մասը գտնվում էր Պարսկաստանի տիրապետության տակ:  Այն զբաղեցնում էր քաղաքի մեծ մասը, որտեղ տեղակայված էին տարատեսակ խանութներ, մզկիթներ և դրամահատարան և ծառայում էր որպես կենցաղամշակութային կենտրոն: 1858 թվականի երկրաշարժից բերդը մասամբ ավերվում է: 1865թ. այս տարածքը ձեռք է բերում առաջին գիլդիայի վաճառական Ներսես Թաիրյանը և բերդի տարածքում կառուցում է գինու գործարան: 1877թ. սկսում է գինու արտադրությունը, իսկ տասը տարի անց՝ 1887 թվականին՝ կոնյակի արտադրությունը: Արտադրանքի սպառման հետ կապված դժվարությունների պատճառով (քանի որ Երևանում չկար երկաթուղի, այն կառուցվել է 1902թ.) Ներսես Թաիրյանը գործարանը մեկ տարի ժամկետով վարձակալության է հանձնում «Շուստով և որդիներ» ռուսական ալկոհոլային ընկերությանը: Մեկ տարի անց`1898թ.-ին, Շուստովը գնում է գործարանը 50.000 ռուբլով: 1920թ. գործարանը պետականացվում է և վերանվանվում ԵՐԵՎԱՆԻ ԱՐԱՐԱՏ ԿՈՆՅԱԿԻ-ԳԻՆՈՒ-ՕՂՈՒ ԿՈՄԲԻՆԱՏ: Սովետական Միության փլուզումից հետո գործարանը գտնվում էր լքված ու խարխլված վիճակում (1991-2002թ): Միայն 2002թ. այս տարածքը ձեռք է բերում հայ գործարար պարոն Գագիկ Ծառուկյանը և սկսում վերակառուցողական աշխատանքները, որոնք տևեցին երկու տարի: Եվ 2004 թվականին տեղի ունեցավ գործարանի վերաբացման արարողությունը: